Þann 26. júní nk. lendir Airbus 320 á Akureyrarflugvelli með allt að 180 ferðamenn frá Slóveníu á vegum Ferðaskrifstofunnar Nonna.  Fólkið, mun leggja leið sína um Norðurland og víðar næstu 7 dagana áður en það snýr til síns heima 3. júlí. Ferðaskrifstofan Nonni var stofnuð 1989 með það að markmiði að taka á móti erlendum ferðamönnum á Akureyri og greiða leið þeirra um Norðurland sérstaklega. Þetta hefur tekist bærilega og er skrifstofan sem betur fer ekki lengur ein, heldur eru fjölmargir aðilar hér á svæðinu, sem allir leggjast á eitt. Í fyrra var ferðaskrifstofan einnig með beint flug frá Slóveníu og eru þessi flug liður í þeirri viðleitni að fá sem flesta ferðamenn beint hingað. Auðvitað væri betra að fá fleiri og reglubundnari flug, en þau hljóta samt að skipta máli, ekki síst nú, þegar Iceland Experess hefur hætt sínu flugi til Akureyrar, segir í frétt frá ferðaskrifstofunni.

Viðunandi nýting á flugvélunum byggist á, að Íslendingar nýti flugið einnig.  Skrifstofan hefur því sett saman áhugaverð ferðatilboð fyrir Íslendinga, sem býðst að fljúga beint til og frá Slóveníu sömu daga.  Hefur eftirspurn verið mjög góð og nær hún til allra landshluta.  Einn af kostum Akureyrarflugvallar, er hversu stuttan tíma það tekur að innrita sig og fara í gegnum vopnaleit.  Lítil fríhöfn er á vellinum og ekkert sem beinlínis vantar. Samstarfsaðilar í Slóveníu eru Adria Airways og ferðaskrifstofur, sem hafa selt ferðir til Íslands í mörg ár.  Það hefur kostað mikla fyrirhöfn að telja hina erlendu samstrafsaðila á að fljúga til Akureyrar, því Reykjavík og Keflavíkurflugvöllur eru flestum efst í huga.  

Í fyrra voru 20 ár liðin síðan Íslendingar viðurkenndu fyrstir þjóða sjálfstæði Slóveníu, og gróðursettu þá hver og einn hinna erlendu gesta eitt tré í sérstakanlundí Kjarnaskógi við Akureyri.  Nú er ætlunin að endurtaka þetta og stækka lundinn.

Sigurður Guðmundsson bæjarfulltrúi Bæjarlistans ræddi um umgengni og umhirðu í Akureyrarkaupstað á fundi bæjarstjórnar í gær. Hann taldi mikilvægt á þessu 150 ára afmæli bæjarins, að allir leggðust á eitt við að gera bæinn sem fallegastan og að hann yrði kominn í sitt besta og fallegasta form á sjálfan afmælisdaginn 29. ágúst nk. Aðrir bæjarfulltrúar sem tóku til máls, tóku undir með Sigurði. Eiríkur Björn Björgvinsson bæjarstjóri tók einnig þátt í umræðunni og hann sagði að því miður væri töluvert af rusli í miðbænum um helgar. Sigurður lagði fram tillögum að bókun, sem samþykkt var samhljóða en þar segir: “Bæjarstjórn samþykkir að fela framkvæmdaráði að vinna áfram að hugmyndum um átak í bættri umgengni og umhirðu í sveitarfélaginu. Leita skal samráðs við skipulagsdeild, hverfisnefndir auk samtaka atvinnurekenda á Akureyri, í þeirri viðleitni að virkja samfélagið í heild sinni til betri vitundar um umgengni og umhirðu.”

Á fundi skólanefndar Akureyrar í gær var lögð fram tillaga um að stofna og tilnefna fulltrúa í starfshóp um skipulag íþrótta- og tómstundaskóla (Heilsdagsskóla) fyrir börn á aldrinum 5 - 9 ára á Akureyri. Markmiðið er að mynda samfelldan skóladag hjá börnum á þessum aldri þar sem fléttað er saman íþróttaiðkun, tómstundum og listsköpun. Reiknað er með því að ráða verkefnastjóra tímabundið í átaksverkefni til að stýra verkinu. Verkefnið þarf að vinna í samstarfi við samfélags- og mannréttindaráð, íþróttaráð, íþróttafélög og tómstundafélög í bænum. Þess vegna var lagt til að í starfshópnum verði einn fulltrúi frá skólanefnd, að samfélags- og mannréttindaráð og íþróttaráð sameinist um einn fulltrúa og að ÍBA og tómstundafélög sameinist um einn fulltrúa. Skólanefnd samþykkti tillöguna samhljóða.

Á fundinum var einnig lagt fram nýtt rekstraruppgjör fyrir árið 2011 með skýringum. Þar kemur fram að reksturinn er í heild 0,4% umfram áætlun eða um 20 milljónir króna. Þar munar mest um hærri húsaleigukostnað og kostnað umfram tekjur í skólamötuneytum allra skólanna.

Öskudagurinnn er á morgun miðvikudag og þá munu akureysk ungmenni taka daginn eldsnemma að vanda og halda út í daginn í alls kyns búningum. Börnin munu heimsækja fyrirtæki, verslanir og stofnanir út um allan bær, taka þar lagið, í þeirri von að fá eitthvað gott að launum. Í tilefni öskudagsins, hafa Leikfélag Akureyrar og Norðurorka leitt saman hesta sína og ætla að bjóða upp á kattarslag á flötinni neðan við Samkomuhúsið kl. 10.30. Í Samkomuhúsinu verður tekið vel á móti öllum syngjandi kátum sjóræningjum og landkröbbum. Krökkum verður boðið upp á svið til að syngja öskudagssöngva og samkeppni verður um flottasta búninginn. Það lið sem slær tunnuna fær fjóra miða á Gulleyjuna. Það lið sem slær köttinn fær fjóra miða á Gulleyjuna og sá sem vinnur búningasamkeppnina fær tvo miða á Gulleyjuna.

Aðalfundur Félags verslunar- og skrifstofufólks Akureyri og nágrenni (FVSA) var haldinn í Alþýðuhúsinu á Akureyri í gær. Um síðustu áramót voru félagsmenn 2.049; 814 karlar og 1.225 konur. Þar af eru 310 lífeyrisþegar. Úlfhildur Rögnvaldsdóttir kynnti skýrslu stjórnar og þar kom m.a. fram að þó starfsemi félagsins hefði verið með hefðbundnum hætti á síðasta ári, þá var þetta mikið framkvæmdaár í sögu félagsins. Úlfhildur fjallaði einnig um atvinnumálin og sagði að þetta þriðja ár frá efnahagshruninu væri eins og hin tvö fyrri merkt atvinnuleysi, kaupmáttarrýrnun og óöryggi á flestum sviðum. Þó hefðu örlítið færri félagsmenn verið á atvinnuleysisbótum flesta mánuði árisins miðað við 2010.

Í máli Úlfhildar kom fram að á síðasta aðalfundi hefði verið sagt frá fyrirhuguðu samstarfi fjögurra stéttarfélaga á þriðju hæð Alþýðuhússins. „Ákveðið var að breyta suðurhluta þriðju hæðar þannig að félögin fjögur hefðu sameiginlega móttöku. Verkið var boðið út í ágúst og þegar framkvæmdir hófust fluttum við starfsemi skrifstofunnar í bráðabirgðaraðstöðu í norðurhluta þriðju hæðar. Í nýuppgert húsnæðið fluttum við svo í lok desember og höfum verið að koma okkur þar fyrir smátt og smátt. Húsnæðið var til sýnis fyrir félagsmenn og gesti 10. febrúar sl. og var ekki annað sjá en að gestir væru ánægðir með breytinguna. Við starfsfólkið erum afar ánægð með hvernig til hefur tekist og trúum að þjónusta við félagsmenn verði enn skilvirkari en áður. Kostnaður okkar félags við húsnæðið ásamt kaupum á sameiginlegu innbúi og ýmsum tækjum mun verða um 15 milljónir.“

Úlfhildur fjallaði um endurskoðunarákvæði kjarasamningsins sem voru til umfjöllunar í janúar þar sem var lagt mat á  hvort ástæða væri til að segja samningnum upp vegna forsendubrests, „því ríkisstjórnin hefur ekki staðið við gefin loforð samkvæmt yfirlýsingu sem hún gaf 5. maí og er hluti kjarasamningsins. Haldnir voru tveir formannafundir ASÍ í janúar og yfirgnæfandi meirihluti á þeim fundum taldi að ekki væri ráðlegt að falla frá samningnum á þessum tíma. Þó er ljóst að aðstæður í þjóðfélaginu hafa lítið batnað undanfarið ár, enn er allt of mikið atvinnuleysi, verðbólga of mikil og skuldsett heimili afar illa stödd.“

Þá fjallaði Úlfhildur um nýlega útkomna skýrslu um starfsemi lífeyrissjóðanna sem sýnir að þeir hafa orðið fyrir mjög miklu tapi til viðbótar því að hafa þurft að skerða réttindi verulega á undanförnum árum, þ.e.a.s almennu sjóðirnir. „Í skýrslunni kemur berlega í ljós sá hróplegi mismunur sem er á kjörum þeirra sem greiða annars vegar til okkar almennu lífeyrissjóða og hins vegar til opinberu sjóðanna. Þó allir sjóðir hafi tapað kemur það aldrei niður á opinberu sjóðunum, þeir eru gulltryggðir af ríkissjóði, almenningur borgar brúsann.“

Þetta kemur fram á vef FVSA.