Að baki Sverris má sjá bát númer 100 sem smíðaður er hjá fyrirtækinu. Mynd/Margrét Þóra.
Að baki Sverris má sjá bát númer 100 sem smíðaður er hjá fyrirtækinu. Mynd/Margrét Þóra.
Bátur númer 100 fer senn á flot
Örfáir dagar eru í stór tímamót hjá bátasmiðjunni Seiglu á Akureyri, en um næstu mánaðamót verður hundraðasta bátnum sem smíðaður er hjá fyrirtækinu rennt út úr smiðjunni. Um er að ræða 70 manna ferju sem siglt verður til nýrrar heimahafnar í Færeyjum. Seigla hlaut Athafna- og nýsköpunarverðlaun Akureyrarbæjar en þau voru afhent á Vorkomu í Ketilhúsinu.
Sverrir Bergsson eigandi Seiglu segir margt spennandi í gangi hjá fyrirtækinu og að reksturinn hafi gengið vel síðustu árin. Fyrirtækið var flutt norður í land árið 2007, en þá keypti fjárfestingarfélag í kringum Slippinn á Akureyri hlut í félaginu og sá um að reisa bátasmiðju á athafnasvæði sínu.
„Við gripum tækifærið og fluttum starfsemina norður, vorum í of litlu húsnæði syðra og höfðum ekki fundið neitt sem hentaði þegar okkur bauðst ágætt húsnæði hér,“ segir Sverrir.
Nánar er rætt við Sverri í prentútgáfu Vikudags.
Haukur Jakobsson, jafna kallaður Haukur Dúdda, lét bleytu og kulda ekki stöðva sig í vikunni. Mynd/Þröstur Ernir.
Haukur Jakobsson, jafna kallaður Haukur Dúdda, lét bleytu og kulda ekki stöðva sig í vikunni. Mynd/Þröstur Ernir.
Golfarar orðnir óþreyjufullir
Þótt golfvertíðin sé hafin fyrir sunnan víðast hvar er enn bið í að golfarar á Akureyri komist á flatirnar. Jaðarsvöllur er að verða auður eftir snjóþungan vetur en völlurinn er hins vegar mjög blautur og verður sennilega ekki opnaður fyrr en í lok maí í fyrsta lagi. „Það á eftir að koma betur í ljós hvernig völlurinn kemur undan vetri,“ segir Steindór Ragnarsson vallarstjóri á Jaðarsvelli. „Mér sýnist stóru svæðin hafa sloppið ágætlega en flatirnar eru margar svolítið laskaðar eftir klakann í vetur. Það skýrist á næstu dögum hversu miklar skemmdirnar eru.“
Halla Sif Svavarsdóttir, framkvæmdastjóri Golfklúbbs Akureyrar, segir sölu á árskortum ganga vel. „Golfarar eru tryggir sínu félagi og það breytist ekkert þótt völlurinn opni ekki strax. Menn eru auðvitað orðnir óþreyjufullir í að byrja að spila og farnir að bíða eftir því að komast á völlinn.
Nánar er fjallað um málið í prentútgáfu Vikudags.
María Björk Guðmundsdóttir formaður Félags hundaeigenda á Akureyri norðan Borga. Mynd/Margrét Þóra.
María Björk Guðmundsdóttir formaður Félags hundaeigenda á Akureyri norðan Borga. Mynd/Margrét Þóra.
Vilja nýtt hundasvæði innan bæjarmarkanna
„Við erum himinlifandi yfir því að framkvæmdaráð tók jákvætt í erindi okkar, en gerum okkur grein fyrir því að málið er ekki í höfn,“ segir María Björk Guðmundsdóttir formaður Félags hundaeigenda á Akureyri. Félagið sendi erindi til framkvæmdaráðs um hundasvæði innan bæjarmarkanna og lagði til að því yrði fundinn staður í námunda við Háskólann á Akureyri, svæði sem afmarkast af Dalsbraut, Borgarbraut og Norðurslóð. Framkvæmdaráð lýsti yfir ánægju með tillöguna og fól starfsmönnum ráðsins að vinna áfram að málinu.
„Hundaeigendur á Akureyri hafi í mörg ár talað um nauðsyn þess að koma upp hundasvæði innan bæjarmarkanna, en af ýmsum ástæðum hefur aldrei orðið neitt úr,“ segir María Björk, en hún var nýlega kjörin formaður
Félags hundaeigenda á Akureyri og segir að ný stjórn hafi sett sér metnaðarfull markmið varðandi starfsemina. Meðal annars að vinna að framgangi þess að hundasvæði verði fundinn staður innan bæjarmarkanna. „Við óskuðum eftir því að fá þetta fallega svæði til afnota, það er um 3000 fermetrar að stærð og okkar hugmynd er sú að skipta því upp og útbúa sérstakt svæði innan þess fyrir smáhunda,“ segir hún.
Nánar er rætt við Maríu í prentútgáfu Vikudags.
Fyrstu skóflustungurnar voru teknar af nýju athafnasvæði Nökkva innan við Höpfnersbryggju í sl. viku. Mynd/Þorgeir Baldursson.
Fyrstu skóflustungurnar voru teknar af nýju athafnasvæði Nökkva innan við Höpfnersbryggju í sl. viku. Mynd/Þorgeir Baldursson.
Deilt um umhverfisátak
Meirihluti framkvæmdaráðs á Akureyri hefur samþykkt tillögur um framkvæmdir á árinu vegna sérstaks umhverfisátaks sem bæjarstjórn veitir hálfan milljarð króna í á næstu fimm árum. Tillögurnar voru samþykktar með þremur atkvæðum gegn tveimur atkvæðum Njáls Trausta Friðbertssonar D-lista og Sigfúsar Arnars Karlssonar B-lista. Þeir Njáll Trausti og Sigfús eru ósáttir við þau 20% sem áætlaðar eru í framkvæmdir fyrir Siglingaklúbbinn Nökkva. „Við hjá Sjálfstæðisflokki erum hlynntir framkvæmdum hjá svæði Nökkva en ekki með þessum hætti,“ segir Njáll Trausti í samtali við Vikudag.
Léleg stjórnsýsla
„Þessar framkvæmdir ættu að falla inn í framkvæmdaáætlun bæjarins en ekki undir sérstakt umhverfisátak. Að taka beina framkvæmd inn í þetta átak finnst mér öfugsnúið og til marks um lélega stjórnsýslu hjá L-listanum. Mér finnst þetta ákveðin sýndarmennska og það er hvergi minnst á hvernig eigi að klára þetta verkefni, en það gerist ekki með þessum 20 milljónum.“
Nánar er rætt við Njál Trausta og fjallað um umhverfisátakið í prentútgáfu Vikudags.
200 þúsund ferðamenn til Akureyrar
Það stefnir í metfjölda í komu erlendra ferðagesta til Akureyrar og nágrenni í sumar. Áætlað er að um 200 þúsund manns sæki höfuðstað norðursins heim en af þeim koma 65-70 þúsund gestir frá skemmtiferðaskipum. Þetta segir Arnheiður Jóhannsdóttir framkvæmdastjóri Markaðstofu Norðurlands. „Við búumst við 20% aukningu frá síðasta sumri í það minnsta. Í fyrra var einnig svipuð aukning á milli ára og því má reikna með allt að helmingi fleiri ferðamönnum á Akureyri í sumar en fyrir tveimur árum."
Nánar er fjallað um málið í prentútgáfu Vikudags.
Akureyri. Mynd/Karl Eskil.
Akureyri. Mynd/Karl Eskil.
Foreldrar eru óttaslegnir
„Það er komin upp hálfgerð skelfing í foreldrum,“ segir Hulda Jóhannsdóttir móðir á Akureyri. Foreldrar barna með ADHD og skylda sjúkdóma eru uggandi vegna þess óvissuástands sem ríkir í barna- og unglinga geðlækningum á Norðurlandi. Enginn starfandi læknir er á því sviði en Páll Tryggvason hætti sem yfirlæknir barna- og geðlæknasviðs á Sjúkrahúsinu á Akureyri fyrir sjö vikum og sótti enginn um hans stöðu.
Páll sinnti börnum á svæðinu frá Djúpavogi og í Hrútafjörð. Hulda á dreng sem þarf á lyfseðilskyldum lyfjum að halda og segir erfitt að nálgast lyfin í dag. Hún segir barnalækna á Sjúkrahúsinu á Akureyri gera sitt besta við endurnýjun á lyfjum en anna ekki eftirspurn. Þá séu margir heimilislæknar hættir að skrifa upp á lyf.
„Fólk er að lenda í því að fá hvorki lyf né sálfræðiþjónustu fyrir börnin sín og það eru óhugnalega margir foreldrar í þessari stöðu. Það kom líka aftan að mörgum þegar Páll hætti störfum. Fólk var ekkert látið vita.“
Nánar er fjallað um málið í prentútgáfu Vikudags.
Karl Frímannsson.
Karl Frímannsson.
Nýtt starf þróunarstjóra
Meirihluti bæjarráðs Akureyrar hefur skipað Karl Frímannsson fræðslustjóra tímabundið í eitt ár í nýtt starf þróunarstjóra starfsmannamála hjá Akureyrarkaupstað. Bæjarráð samþykkti tillöguna með fjórum atkvæðum gegn atkvæði Andreu Sigrúnar Hjálmsdóttur, fulltrúa Vinstri hreyfingar græns framboðs. Hún mótmælir ráðningunni og segir í bókun að hún hafi fullan skilning á því að leysa þurfi flókin starfsmannamál innan bæjarkerfsins, en í ljósi þröngrar fjárhagsstöðu bæjarsjóðs geti hún ekki studd ráðninguna.
„Þetta fer alfarið gegn markmiðum bæjarstjórnar um opnari stjórnsýslu og faglegri vinnubrögð að auglýsa ekki nýjar stöður í æðstu stjórnlögum starfsmanna bæjarins. Þessi vinnubrögð fara gegn sannfæringu minni um bætta starfshætti við stjórnsýslu bæjarins. Ég minni á að í stefnuskrá L-listans var bæjarbúum lofað að öll störf hjá bænum yrði auglýst og þar er einnig sett fram markmið um hagræðingu í stjórnkerfi bæjarins með það fyrir augum að einfalda yfirstjórnina. Það veldur því vonbrigðum að horfið hafi verið frá þessum ágætu og faglegu markmiðum meirihlutans,“ segir Andrea.
Fulltrúar L-lista benda á að um tímabundna ráðningu sé að ræða og gangi hún því hvorki gegn reglum sveitarfélagsins né stefnu L-listans.
Hlutverk þróunarstjórans snýr að umbótum í starfsmannamálum bæjarins og eftirfylgni með mannauðsstefnu bæjarstjórnar í nánu samstarfi við starfsmannastjóra. Karl mun gegna starfinu til 15. maí á næsta ári.
Hrefna G. Torfadóttir formaður KA, Halldór Jóhannsson frakvæmdastjóri KEA g Árni Óðinsson formaður Þórs/Mynd Karl Eskil
Hrefna G. Torfadóttir formaður KA, Halldór Jóhannsson frakvæmdastjóri KEA g Árni Óðinsson formaður Þórs/Mynd Karl Eskil
KEA styrkir KA og Þór
Halldór Jóhannsson, framkvæmdastjóri KEA, hefur undirritað styrktarsamninga við félögin KA og Þór vegna ársins 2013 og skrifaði Hrefna G. Torfadóttir undir samninginn fyrir hönd KA og Árni Óðinsson fyrir hönd Þórs. Þau voru sammála um að stuðningur KEA væri afar þýðingarmikill fyrir félögin og efldi starf og uppbyggingu þeirra umtalsvert, en KEA hefur á undanförnum árum verið einn af helstu styrktaraðilum félaganna. Halldór Jóhannsson sagði að KEA legði jafnan metnað sinn í að skila jákvæðri afkomu félagsins út í samfélagið til eflingar íþrótta- og æskulýðsstarfi á félagssvæðinu og undirritun þessara samninga væri því mikið gleðiefni.
Sigrún Stefánsdóttir er meðal umsækjenda.
Sigrún Stefánsdóttir er meðal umsækjenda.
Ólína og Sigrún sækja um stöðu forseta
Fimm sóttu um stöðu forseta hug- og félagsvísindasviðs Háskólans á Akureyri en umsóknarfrestur rann út þann 6. maí sl. Meðal umsækjenda er þingkonan fyrrverandi Ólína Þorvarðardóttir og Sigrún Stefánsdóttir fyrrum dagskrástjóri RÚV og doktor í fjölmiðlafræði. Aðrir umsækjendur eru Haukur Arnþórsson, stjórnsýslufræðingur, Ingunn Björnsdóttir, lyfjafræðingur og Rögnvaldur D. Ingþórsson, heimspekingur.
Eyþór Ingi Jónsson og Eyþór Ingi Gunnlaugsson þykja ekkert sérstaklega líkir í útliti. Þeim er þó gjarnan ruglað saman.
Eyþór Ingi Jónsson og Eyþór Ingi Gunnlaugsson þykja ekkert sérstaklega líkir í útliti. Þeim er þó gjarnan ruglað saman.
Fær vinabeiðnir frá Evróvision aðdáendum
„Eflaust ruglar það fólk í ríminu að ég er ekki með prófíl mynd af sjálfum mér heldur fugli. Margir aðdáendur söngkeppninnar halda því að ég sé hinn eini sanni söngvari,“ segir Eyþór Ingi Jónsson organisti á Akureyri. Vinabeiðnir hafa hrannast upp á Facebook síðunni hans þar sem fólk ruglar honum saman við Eyþór Inga Gunnlaugsson, júróvisionfara okkar Íslendinga.
„Þetta eru aðallega Suður-Amerískir karlmenn og Austur-Evrópskar konur.“ Aðspurður segist hann taka þessu með jafnaðargeði. „Mér finnst þetta bara fyndið og ég er ekkert að fara breyta um prófíl mynd þrátt fyrir þennan rugling,“ segir Eyþór og hlær. Hann segir þetta ekki í fyrsta sinn sem þeim nöfnum sé ruglað saman.
Nánar er rætt við Eyþór Inga í prentútgáfu Vikudags í dag.
Vorsýning
Hin árlega Vorsýning Myndlistaskólans á Akureyri verður opnuð laugardaginn 18. maí í húsnæði skólans Kaupvangsstræti 16. Sýnd verða verk nemenda fornámsdeildar, listhönnunar- og fagurlistadeildar. Þar gefur að líta sýnishorn af því helsta sem nemendur í frjálsri myndlist og grafískri hönnun hafa verið að fást við á þessu skólaári. Auk þess verða á sýningunni verk eftir nemendur á barna- og unglinganámskeiðumá vorönn. Alls stunduðu fimmtíu og átta nemendur nám í dagdeildum skólans og af þeim munu tuttugu og sex brautskrást frá skólanum að þessu sinni.
Allir eru hjartanlega velkomnir í Myndlistaskólann á Akureyri sýningardagana. Opnunartími kl. 13 til 17 og lýkur sýningunni mánudaginn 20. maí.
MP banki kaupir Íslensk verðbréf
MP banki hefur gert tilboð í allt hlutafé í Íslenskum verðbréfum hf. og hefur tilskilinn meirihluti eigenda félagsins gengið að skilmálum tilboðsins. MP banki hf. á rætur sínar að rekja til ársins 1999 og starfa 130 starfsmenn í samstæðu bankans. Í apríl 2011 lögðu yfir 40 innlendir og erlendir fjárfestar MP banka til 5,5 milljarða króna í nýtt hlutafé og ný stjórn tók við. Forstjóri er Sigurður Atli Jónsson og formaður stjórnar er Þorsteinn Pálsson.
Íslensk verðbréf eru sérhæft eignastýringarfyrirtæki sem sinnir viðskiptavinum um allt land. Félagið var stofnað árið 1987 og starfsmenn félagsins eru 20 talsins. Viðskiptavinir Íslenskra verðbréfa eru margir af stærstu lífeyrissjóðum landsins, tryggingarfélög, fyrirtæki, sveitarfélög og einstaklingar. Hluthafar Íslenskra verðbréfa hf. eru ellefu talsins og eru sex hluthafar sem eiga meira en 5% hlut.
- Síða 1 af 761
- ››