Úr leik KA og Magna í gær. Mynd: Sævar Geir.

Fimmtudagur 17. maí 2012 - 09:39

KA burstaði Magna í bikarnum

KA lenti ekki í teljandi vandræðum með granna sína í Magna og sigraði 7-0 er liðin áttust við í Boganum í gærkvöld í fyrstu umferð bikarkeppni KSÍ í karlaflokki. Brian Gilmour og Þórður Arnar Þórðarson skoruðu tvö mörk hvor og þeir Bjarki Baldvinsson, David Disztl og Guðmundur Óli Steingrímsson sitt markið hver. Þá komst Dalvík/Reynir áfram í aðra umferð eftir 2-0 sigur gegn Tindastól en sá leikur fór einnig fram í Boganum. Bessi Víðisson og Ottó Hólm Reynisson skoruðu mörk Dalvíkur/Reynis.

Þá urðu athyglisverð úrslit í leik Hauka og Snæfells þar sem Haukar unnu 31-0. Leikur Þórs og KF sem átti að fara fram í gærkvöld var frestað vegna vallarskilyrða og fer fram þann 22. maí.

Miðvikudagur 16. maí 2012 - 14:41

Leik Þórs og KF frestað

Leik Þórs og KF í bikarkeppni KSÍ í karlaflokki sem átti að fara fram í kvöld á Siglufjarðarvelli hefur verið frestað til 22. maí sökum slæmra vallarskilyrða. Leikur Magna og KA var færður inn í Bogann og hefst hann kl. 19:00 í kvöld.

Fjalar Úlfarsson er nýr landsliðsþjálfari í alpagreinum.

Þriðjudagur 15. maí 2012 - 17:02

Fjalar ráðinn landsliðsþjálfari í alpagreinum

Fjalar Úlfarsson hefur verið ráðinn landsliðsþjálfari í alpagreinum hjá Skíðasambandi Íslands og tekur hann við starfinu af Árna Þór Árnasyni sem lét af störfum á dögunum. Fjalar er íslenskum skíðamönnum að góðu kunnur en hann hefur starfað sem yfirþjálfari hjá Skíðafélagi Akureyrar um árabil og var aðstoðarmaður skíðamannsins Björgvins Björgvinssonar síðasta árið sem Björgvin var við æfingar og keppni. Einnig hefur Fjalar tekið að sér verkefni fyrir skíðasambandið sem þjálfari á stórmótum erlendis.

Stúlkurnar í 3. flokki kátar með verðlaunin.

Þriðjudagur 15. maí 2012 - 09:45

Frábær árangur FIMAK á Vormóti FSÍ

Keppendur frá Fimleikafélagi Akureyrar gerðu frábæra hluti á Vormóti FSÍ í hópfimleikum sem fram fór á Egilstöðum sl. helgi en keppt var í landsreglum. FIMAK sendi sjö lið til keppni og kom hlaðið verðlaunum til baka. Í 3. flokki stúlkna sendi félagið eitt lið til leiks sem sigraði sinn flokk og vann einnig deildarmeistaratitilinn fyrir samanlagðan árangur í vetur. Einnig bar lið frá FIMAK sigur úr býtum í 5. flokki og hlaut einnig deildarmeistaratitilinn í þeim flokki. Bæði þessi lið urðu einnig Íslandsmeistarar í sínum flokki fyrr í vetur. Í fyrsta sinn í sögu félagsins sendi FIMAK drengjalið til keppni í 5. flokki drengja sem hafnaði í þriðja sæti og í opnum flokki hafnaði félagið í þriðja sæti, en þar kepptu unglingar sem æfa fimleika án áherslu til keppni.

Bjarni Fritzson svífur inn í teiginn í leik með Akureyri í vetur.

Mánudagur 14. maí 2012 - 11:14

Bjarni besta hægri skyttan

Bjarni Fritzson, leikmaður og þjálfari Akureyrar, var valinn í úrvalslið N1-deildar karla í handknattleik fyrir nýafstaðið tímabil en liðið var kunngjört í lokahófi HSÍ á dögunum. Bjarni, sem leikur bæði í hægra horninu og hægri skyttu, var valinn besta hægra skyttan. Hann fékk einnig viðurkenningu fyrir að vera markahæsti leikmaður deildarinnar en hann skoraði 163 mörk í vetur. Maður lokahófsins var hins vegar Ólafur Bjarki Ragnarsson, leikmaður Íslandsmeistara HK, en hann var valinn besti leikmaður deildarinnar, besta vinstri skyttan, besti sóknarmaðurinn og fékk þar að auki Valdimarsbikarinn, en hann er veittur þeim leikmanni sem þykir sá mikilvægasti í deildinni.

Úrvalsliðið fyrir tímabilið 2011-2012 er þannig skipað: Markvörður: Aron Rafn Eðvarðsson Haukum, línumaður Atli Ævar Ingólfsson HK, vinstra horn Bjarki Már Elísson HK, vinstri skytta Ólafur Bjarki Ragnarsson HK, hægra horn Gylfi Gylfason Haukum, hægri skytta Bjarni Fritzson Akureyri og miðjumaður Örn Ingi Bjarkason FH.

Önnur helstu verðlaunin í lokahófinu voru þannig að besti varnarmaðurinn var valinn Matthías Árni Ingimarsson Haukum, Aron Rafn Eðvarsson Haukum besti markvörðurinn, Böðvar Páll Ásgeirsson Aftureldingu efnilegasti leikmaðurinn, Aron Kristjánsson Haukum besti þjálfarinn og þeir Anton Gylfi Pálsson og Hlynur Leifsson besta dómaraparið.

Robin Strömberg. Mynd: Páll Jóhannesson.

Mánudagur 14. maí 2012 - 10:03

Sænskur framherji til Þórs

Þórsarar hafa fengið sænskan framherja til liðs við félagið en sá er tvítugur og heitir Robin Strömberg. Hann hefur leikið með Mjallby í Allsvenska í heimalandi sínu undanfarið og lék sex leiki með liðinu í fyrra í sænsku úrvalsdeildinni. Robin gekk frá samningi við Þór um liðna helgi eftir að hafa æft með liðinu í nokkra daga og gæti leikið sinn fyrsta leik fyrir félagið á miðvikudaginn kemur þegar Þór sækir KF heim í fyrstu bikarkeppni KSÍ.

torka_stjarnan_pepsi_saevar_16_of_23-11023

Mynd: Sævar Geir.

Sunnudagur 13. maí 2012 - 18:02

Þór/KA skellti meisturunum

Þór/KA gerði sér lítið fyrir og skellti Íslandsmeisturum Stjörnunnar 3-1 á heimavelli í dag í fyrstu umferð Pepsi-deildar kvenna í knattspyrnu en vegna veðurs var leikið innan dyra í Boganum. Ásgerður Stefanía Baldursdóttir kom Stjörnunni yfir eftir tíu mínútna leik með marki úr vítaspyrnu, eftir að boltinn virtist hafa farið í hönd leikmanns Þórs/KA. Heimamenn jöfnuðu metin skömmu fyrir leikhlé með marki Katrínar Ásbjörnsdóttur og staðan 1-1 í hálfleik. Þegar sjö mínútur voru til leiksloka kom Katrín Þór/KA 2-1 yfir með marki af stuttu færi og aðeins fjórum mínútum síðar skoraði Sandra María Jessen þriðja mark heimamanna og gulltryggði sigur Þórs/KA.

Sunnudagur 13. maí 2012 - 11:14

„Getum blandað okkur í toppbaráttuna“

Pepsi-deild kvenna í knattspyrnu rúllar af stað í dag með heilli umferð. Þór/KA fær Íslandsmeistara Stjörnunnar í heimsókn í fyrstu umferð og hefst leikurinn kl. 16:00 í Boganum, en vegna slæmrar veðurspár var leikurinn færður af Þórsvelli. Norðanliðið mætir með mikið breytt lið til leiks frá því í fyrra. Nýr þjálfari tók við liðinu sl. haust, Jóhann Kristinn Gunnarsson, en hann tók við af Hlyni Svan Eiríkssyni sem nú þjálfar Breiðablik. Einnig hafa margir lykilmenn liðsins farið frá félaginu og því mætir Þór/KA til leiks í sumar sem óskrifað blað. Vikudagur sló á þráðinn til Jóhanns Kristins í vikunni og spurði hann út í sumarið.

„Hér eru allir spenntir og klárir í slaginn. Við höfum ekki sett okkur neitt markmið um að ná ákveðnu sæti í deildinni en við ætlum okkur að vera með í toppbaráttunni,“ segir hann. Sem fyrr segir hefur leikmannahópur Þórs/KA tekið miklum breytingum og mest munar um þær Rakel Hönnudóttir (Breiðablik), Mateju Zver (Slóvenía), Manyu Makoski (Finnland) og markvörðinn Berglindi Magnúsdóttur (Danmörku), en allar spiluðu þær stórt hlutverk með liðinu í fyrra. Þór/KA hefur hins vegar bætt við sig sterkum leikmönnum. Liðið hefur t.d. fengið þrjá Bandaríkjamenn, markvörðinn Chentel Nicole Jones og framherjana Kayle Grimsley og Tahnai Annis, og landsliðskonuna Katrínu Ásbjörnsdóttur frá KR og Þórhildi Ólafsdóttur frá ÍBV. Þór/KA gekk illa á undirbúningstímabilinu og fór stigalaust í gegnum Lengjubikarinn í vetur, en mikið af sterkum leikmönnum vantaði hins vegar í liðið í þeirri keppni.

Í árlegri spá forráðarmanna félaganna í deildinni er Breiðablik spáð Íslandsmeistaratitlinum en Þór/KA er spáð fimmta sætinu. Um þá spá segir Jóhann: „Þetta er eflaust bara eins og menn sjá þetta núna eftir leikina í vetur og hvað menn hafa verið að bæta við sig og missa. Við teljum okkur geta endað ofar.“ Hann segir spennandi verkefni að mæta Íslandsmeisturum Stjörnunnar í fyrsta leik. „Það er alveg frábært að byrja á móti þeim á flottum Þórsvellinum. Við ætlum okkur að gera heimavöllinn sterkan og reynum að ná góðum úrslitum í fyrsta leik,“ sagði Jóhann.

Jóhann Helgi Hannesson skoraði annað mark Þórs i dag.

Laugardagur 12. maí 2012 - 15:58

Þór vann en KA tapaði

Þór hóf 1. deildina í knattspyrnu karla með 2-0 sigri gegn Leikni R. á heimavelli í dag en KA-menn töpuðu 2-3 gegn ÍR á útivelli. Eftir afar bragðdaufan fyrri hálfleik á Þórsvelli lifnaði yfir leiknum í þeim seinni og Sigurður Marinó Kristjánsson kom Þór yfir á 63. mínútu með skoti sem fór af leikmanni Leiknis og í netið. Sigurður Marinó lagði svo upp síðara mark Þórs sem kom fimm mínútum fyrir leikslok, en það skoraði Jóhann Helgi Hannesson af stuttu færi eftir hornspyrnu frá Sigurði.

Guðmundur Óli Steingrímsson kom KA yfir á ÍR-velli seint í fyrri hálfleik en Jón Gísli Ström jafnaði fyrir ÍR snemma í þeim seinni. Nigel Quashie kom ÍR yfir á 65. mínútu en Jóhann Helgason jafnaði metin fyrir KA níu mínútum fyrir leikslok. Það var svo fyrrum leikmaður KA, Elvar Páll Sigurðsson, sem tryggði ÍR sigur með marki á lokamínútum leiksins.

Laugardagur 12. maí 2012 - 13:23

Rúnar að taka við liði Aue?

Rúnar Sigtryggsson er í viðræðum við þýska handknattleiksliðið Aue um að taka við liðinu í sumar samkvæmt heimildum Vikudags. Rúnar vildi ekki staðfesta þetta í samtali við Vikudag en sagði að málið myndi skýrast um næstu helgi. „Þetta kemur allt í ljós þá,“ sagði Rúnar en vildi að öðru leyti ekki tjá sig um málið. Aue leikur í þýsku 2. deildinni næsta haust eftir að hafa leikið í 3. deildinni í vetur. Rúnar hefur m.a. þjálfað Eisenach í Þýskalandi en þjálfaði síðast lið Akureyrar hér heima með fínum árangri en hætti með liðið vorið 2010.

Rúnar á einnig farsælan feril að baki sem handknattleiksmaður, bæði hér heima og erlendis, og á einnig fjölmarga landsleiki að baki. Eins og við greindum frá í gær hefur markvörðurinn Sveinbjörn Pétursson gert tveggja ára samning við Aue eftir að hafa leikið með liði Akureyrar undanfarin tvö ár.

thor_valur_lengju_2012_saevar_11_of_21-11008

Þórsarar hefja leik á heimavelli í dag. Mynd: Sævar Geir.

Laugardagur 12. maí 2012 - 09:25

Flautað til leiks í 1. deild karla í knattspyrnu

Flautað verður til leiks á Íslandsmótinu í 1. deild karla í knattspyrnu í dag og er heil umferð á dagskrá. Stórleikur umferðarinnar verður á Þórsvelli kl. 14:00 er heimamenn í Þór taka á móti Leikni, en báðum liðum er spáð velgengni í sumar. KA hefur leik á útivelli gegn ÍR á sama tíma. Páll Viðar Gíslason, þjálfari Þórs, segir liðið setja stefnuna á að fara rakleiðis upp í efstu deild á ný. „Það er ekkert leyndarmál að við ætlum að stoppa stutt við í þessari deild. Við setjum þá pressu á okkur sjálfa að koma okkur aftur upp á meðal þeirra bestu,“ sagði Páll Viðar í samtali við Vikudag. Um leikinn gegn Leikni í dag segir Páll.

„Við erum fyrst og fremst afskaplega spenntir yfir því að hefja mótið og fáum verðugan andstæðing í fyrsta leik. Þetta er vel skipulagt og gott lið en ég er á því að við séum með betra lið. Við eigum að vinna Leikni á heimavelli og það kemur ekkert annað til greina en sigur. Við ætlum að halda uppteknum hætti hér á heimavelli og ekki hleypa liðum frá okkur með stig í farteskinu,“ segir Páll.

Gunnlaugur Jónsson, þjálfari KA, segir mikinn spenning í liðinu fyrir sumrinu. „Okkur hlakkar til að byrja eftir langt og strangt undirbúningstímabil sem er að baki. Við teljum okkur vera klára í slaginn,“ sagði Gunnlaugur. Honum líst ágætlega á að hefja mótið gegn ÍR á útivelli. „Við byrjuðum í Breiðholtinu í fyrra líka og það leggst bara vel í okkur. Það er fínt að byrja fyrstu leikina á útivelli og gefa grasinu á Akureyrarvelli meiri tíma til þess að ná sér alveg góðu fyrir fyrsta heimaleikinn,“ segir Gunnlaugur.

Nánar er rætt við þá Pál Viðar og Gunnlaug um komandi tímabil í 1. deildinni í nýjasta tölublaði Vikudags.

Sveinbjörn Pétursson mun spreyta sig í Þýskalandi næsta vetur.

Föstudagur 11. maí 2012 - 13:47

Sveinbjörn samdi við Aue

Markvörðurinn Sveinbjörn Pétursson hefur gert tveggja ára samning við þýska b-deildarliðið Aue í handknattleik en þetta staðfesti Sveinbjörn við Vikudag. Eins og Vikudagur greindi frá í morgun hefur Sveinbjörn ákveðið að yfirgefa herbúðir Akureyringa eftir tvö farsæl tímabil en hann hefur verið lykilmaður hjá liðinu og verið einn besti markvörður N1-deildarinnar undanfarin ár.

„Þetta er frábært tækifæri fyrir mig til að taka næsta skref sem handboltamaður og ég er mjög spenntur fyrir þessu. Það er flott aðstaða þarna og liðið er að styrkja sig eftir að hafa komið upp úr C-deildinni í vetur. Ég tel þetta lið hentar mér vel til gera mig að betri handboltamanni,“ sagði Sveinbjörn í spjalli við Vikudag.

Hann segir aðdragandan að félagaskiptunum hafa verið stuttan, en Sveinbjörn hafði nýlega samið við Akureyringa til eins árs og því nokkuð óvænt tíðindi.

„Þeir hjá Aue höfðu samband við mig strax þegar tímbilinu hérna var lokið og þetta var of gott tækifæri til þess að hafna því. En ég fer frá Akureyri með söknuði því ég hef átt afar góðan og lærdómsríkan tíma hjá liðinu. Ég náði að springa út fyrir norðan og vekja athygli á mér,“ sagði Sveinbjörn.