RÚV Norðurland

Íslenska kvennalandsliðið í körfuknattleik tapaði naumlega fyrir liði Finnlands 83-80 í síðasta leik sínum á Norðurlandamótinu í Ósló í Noregi í dag. Íslenska liðið tapaði tveimur leikjum og vann tvo og hlýtur bronsverðlaun en það er besti árangur sem Ísland hefur náð á mótinu.

Helenda Sverrisdóttir skoraði 28 stig og tók 9 fráköst, María Ben Erlingsdóttir var með 15 stig, Pálína Gunnlaugsdóttir gerði 12 stig og Margrét Kara Sturludóttir bætti við 9 stigum.  

Greta Salóme Stefánsdóttir, höfundur og flytjandi íslenska Evróvisjón-lagsins, segir fulltrúa Svíþjóðar hafa blandað saman pólitík og söngvakeppninni, en að keppendur hafi verið beðnir um að gera það ekki.

Fréttir hafa borist af því að mótmælendur hafi verið handteknir í Bakú, höfuðborg Aserbaísjan í morgun, eftir fjölmenn götumótmæli þar í gær. Greta sagði í samtali við fréttastofu fyrr í dag að íslenski hópurinn hefði ekkert orðið var þau.„Við höfum ekkert orðið vör við neitt svoleiðis enda hefur oft verið ítrekað við okkur náttúrulega að keppnin er ópólitískur vettvangur og við erum beðin um að blanda ekki pólitík og tónlist saman. Og það er bara það sem við höfum gert, við höfum í raun bara einbeitt okkur að því sem við erum fengin hingað út til að gera.“

read more

Hrafnhildur Lúthersdóttir tryggði sér í dag sæti í úrslitum í 50 metra bringusundi á Evrópumeistaramótinu í Ungverjalandi. Hrafnhildur kom í mark á tímanum 31.95 sekúndur í undanúrslitum og hafnaði í 7. sæti.

Íslandsmet Hrafnhildar í greininni er 31.85 sekúndur en það setti hún í undanrásunum í morgun.Erla Dögg Haraldsdóttir synti einnig í undanúrslitunum í dag en hún kom í mark á tímanum 32.27 sekúndur og hafnaði í 14. sæti.      

Fjölmiðlafulltrúi breska tónlistarmannsins Eltons Johns segir líðan söngvarans ágæta en hann fékk alvarlega lungnasýkingu fyrir skömmu.

Sir Elton John, sem er orðinn hálfsjötugur, þurfti að aflýsa tónleikum í Las Vegas í vikunni vegna veikinda og var lagður inn á sjúkrahús í Los Angeles snemma á miðvikudagsmorgun.Hann ku nú vera kominn heim til sín og þarf að taka það rólega á næstunni meðan hann jafnar sig. John og sambýlismaður hans, David Furnish, eiga 17 mánaða son, Zachary, sem þeir eignuðust með aðstoð staðgöngumóður.

Bryti Benedikts páfa XVI, Paolo Garbriele að nafni, hefur verið settur í gæsluvarðhald vegna rannsóknar á að ýmsum viðkvæmum upplýsingum úr Páfagarði hefur verið lekið í fjölmiðla að undanförnu.

Nefnd sem páfi skipaði til að rannsaka upplýsingalekann komst að þeirri niðurstöðu að brytinn hefði hnuplað ýmsum leyniskjölum og komið þeim út fyrir múra Páfagarðs. Í þeim koma fram upplýsingar um meinta spillingu, óstjórn og ágreining hátt settra kirkjunnar manna. Paolo Gabriele hefur verið náinn samstarfs- og aðstoðarmaður Benedikts páfa og einn fárra sem hafði aðgang að einkahíbýlum hans. Ítalskir fjölmiðlar hafa greint frá því að mikið af leyniskjölum hafi fundist í íbúð brytans og í dag staðfesti talsmaður Páfagarðs að Paolo Gabriele væri í gæsluvarðhaldi vegna málsins.

read more

Dómstóll í Wupperthal í Þýsklandi úrskurðaði á dögunum að atvinnulaus maður sem rak kebab-veitingahús um nokkurra ára skeið skyldi standa skil á upphæð sem hann skuldar skattayfirvöldum vegna rekstrarins. Maðurinn hagræddi bókhaldinu töluvert til að lækka hjá sér skattabyrðina.

Niðurstaðan varð sú að hann skuldaði ríkinu 400 þúsund evrur. Maðurinn er hins vegar búinn að selja reksturinn og kominn á atvinnuleysisskrá.Dómarinn átti um fátt annað að velja en að dæma hann í fangelsi næstu tvö árin. Sú varð þó ekki niðurstaðan heldur skal seki inna af hendi 500 klukkustunda samfélagsþjónustu og greiða niður skattaskuldina um 10 evrur á mánuði.Samkvæmt því verður hinn seinheppni skattsvikari orðinn skuldlaus við skattayfirvöld eftir um það bil 3.333 ár.

Þýsku liðin Kiel og Fϋsche Berlín áttust við í fyrri úrslitaleik Meistaradeildarinnar í handknattleik í dag og var það meistaralið Kiel sem hafði sigur 25-24. Alfreð Gíslason er þjálfari Kiel en Dagur Sigurðsson stýrir liði Fϋsche Berlín.

Kiel hafði yfirhöndina í fyrri hálfleik og náði mest sex marka forystu en staðan var 15-12 í hálfleik. Leikmenn Berlínarliðsins komu ákveðnir til leiks í síðari hálfleik og tókst að jafna metin í 23-23 sex mínútum fyrir leikslok. Eftir það var leikurinn í járnum en Kiel reyndist sterkara á lokasprettinum og hafði eins marks sigur 25-24. Filip Jicha var langmarkahæstur í liði Kiel með ellefu mörk en Aron Pálmarsson tókst ekki að skora fyrir liðið. Alexander Petersson skoraði mest fyrir Fϋsche Berlín eða sjö mörk.

read more

Alvarlegir þurrkar í Norður Kóreu að undanförnu eru farnir að valda íbúunum erfiðleikum.

Í frétt frá opinberri fréttastofu landsins segir að ef þurrkarnir halda áfram út maímánuð verði hann hinn þurrasti í landinu í hálfa öld. Í norður kóreska dagblaðinu Rodong Sunmun segir að opinberum starfsmönnum hafi verið skipað að vera bændum innan handar við að útvega vatn til að vökva uppskeruna. Nota skuli allt vatn sem til fellur til að bjarga henni. Hrísgrjónaakrarnir hafa orðið sérstaklega illa úti að undanförnu, að sögn blaðsins. Svipað er að segja um hveitiakra og kartöflugarða.

Sáralítill möguleiki er nú talinn á því að þau Greta Salóme og Jónsi fari með sigur af hólmi í Söngvakeppni evrópskra sjónvarpsstöðva í kvöld, ef marka má útreikninga breska veðmálafyrirtækisins Ladbrokes.

Líkurnar á sigri þeirra eru sagðar 66 á móti einum, 66/1, sem þýðir að sá sem veðjar einu pundi á sigur Íslands fær 66 pund upp úr krafsinu. Átján þjóðir eru taldar líklegri til sigurs, þar á meðal Norðmenn, Danir og Svíar. Sænska lagið er sem fyrr talið langsigurstranglegast, líkur á sigri þess eru sagðar fimm á móti fjórum 5/4, en rússnesku ömmurnar koma svo næst á eftir.Sigurlíkur Íslands hafa dvínað mjög eftir því sem liðið hefur á vikuna. Á þriðjudaginn voru þær taldar fjórtán á móti einum 14/1. 

Mark Webber á Red Bull verður á ráspól í Formúlu 1 kappakstrinum í Mónakó á morgun þrátt fyrir að hafa verið annar í tímatökunni í dag. Michael Schumacher á Mercedes náði besta tímanum en færist aftur um fimm sæti á ráslínu vegna refsingar sem hann hlaut eftir kappaksturinn á Spáni fyrr í mánuðinum.

Nico Rosberg á Mercedes verður annar á ráslínu á morgun og Lewis Hamilton á McLaren þriðji en Romain Grosjean á Lotus-Renault verður fjórði og Fernando Alonso á Ferrari fimmti. Núverandi heimsmeistari ökuþóra, Sebastian Vettel á Red Bull, verður tíundi á ráslínu.    

Ali Kerimli, leiðtogi asersku stjórnarandstöðunnar, var færður á lögreglustöð í Bakú í morgun eftir fjölmenn götumótmæli í miðborginni í gær. Lögregla hefur þrívegis leyst upp mótmælafundi í Bakú í vikunni og handtekið fjölda manns.

Ungliðahreyfing flokks Kerimlis stóð fyrir mótmælunum í miðborginni í gær. Þau spruttu upp úr baráttufundi fyrir utan heimili stjórnarandstöðuleiðtogans þar sem þess var krafist að pólitískir fangar yrðu látnir lausir. Þegar ungliðarnir færðu sig á opið svæði þar sem fyrir var fjöldi fjölmiðlamanna og eftirlitsmanna kom hins vegar fjölmennt lið óeinkennisklæddra lögreglumanna á vettvang og handtók um 50 manns.

read more

Tæplega níutíu hælisleitendur í Danmörku eru í mótmælasvelti. Margir þeirra hafa ekki nærst á öðru en vatni í þrjár vikur. Flestir hafa þeir árum saman beðið úrlausnar mála sinna og grípa því til örþrifaráða.

18 hælisleitendur í Sigerslev á Suður-Sjálandi hófu mótmælasveltið fyrir þrem vikum. Fljótlega bættust fleiri í hópinn og nú eru tæplega 90 manns á 7 stöðum í landinu sem ekki nærast á öðru en vatni. Fólkið er frá Íran og Sýrlandi og býr allt í húsnæði sem Rauði krossinn hefur umsjón með. Læknar Rauða krossins hafa miklar áhyggjur af líðan fólksins og segja suma úr hópnum orðna mjög máttfarna. Farið sé að bera á sjóntruflunum, lakari heyrn og fleira sem fylgi langvarandi næringarskorti.

read more

Eyjafjörður er nú kolmórauður að hluta vegna framburðar úr Eyjafjarðará. Ágúst Ólafsson, fréttamaður RÚV á Norðurlandi tók þessar myndir sem sýna glöggt skilin og hvar gruggugt vatnið úr ánni hefur runnið út í fjörðinn.

Óðinn Björn Þorsteinsson, kúluvarpari úr FH, og Stefanía Valdimarsdóttir, hlaupari úr Breiðabliki, náðu bestum árangri karla og kvenna á öðru stigamóti sumarsins í mótaröð Frjálsíþróttasambands Íslands sem haldið var á Laugardalsvelli nú fyrir helgi.

Óðinn Björn vann keppni í kúluvarpi með kast uppá 18,59 metra sem gaf honum 1.012 stig. Stefanía fór með sigur af hólmi í 400 metra grindarhlaupi þegar hún hljóp á tímanum 1:02,11 og hlaut fyrir það 961 stig. Ásdís Hjálmsdóttir úr Ármanni kastaði spjótinu 54,56 metra og vann greinina með yfirburðum en Íslandsmet hennar er 61,37 metrar. Hilmar Örn Jónsson úr ÍR kastaði 5 kg sleggju 67,89 metra og er það langt yfir lágmarki á heimsmeistaramót unglinga 17 ára og yngri sem haldið verður á næsta ári.

read more

Magnús Leopoldsson fasteignasali segir að erfitt hafi verið að fá fjármagn til kaupa á bújörðum eftir hrun. Nítján jarðir í eigu Lífsvals eru auglýstar til sölu í blöðunum í dag.

Lífsval var umsvifamikið í jarðakaupum fyrir hrun og hefur komið fram að félagið eigi um fjörutíu og fimm jarðir.Á síðasta ári hafði félagið ekki getað greitt af láni frá Landsbankanum upp á rúmar 560 milljónir og krafðist þá bankinn þess að fjórar jarðir félagsins  yrðu seldar nauðungarsölu. Ein af þeim var Flatey á Hornafirði þar sem er eitt stærsta kúabú landsins. Sú jörð er núna ein af nítján jörðum í eigu félagsins sem auglýstar eru til sölu.  

read more

Sveitarstjórinn í Rangárþingi eystra vonar að nýtt deiliskipulag fyrir Ytri-Skóga geri út um tuttugu ára deilur um veginn upp á Fimmvörðuháls. Tillagan var kynnt á fundi með íbúum í vikunni.

Til að komast akandi upp á Fimmvörðuháls þarf að keyra í gegnum hlaðið á bænum Ytri-Skógum undir Eyjafjöllum með tilheyrandi óþægindum fyrir íbúa þar. Til að bregðast við átroðningi hafa ábúendur stundum lokað veginum, við misjafnar undirtektir.Ísólfur Gylfi Pálmason, sveitarstjóri í Rangárþingi eystra, segir að eftir gosin á Fimmvörðuhálsi og í Eyjafjallajökli hafi ferðaþjónustufyrirtæki í auknum mæli viljað aka þennan veg. „Menn hafa jafnvel verið að selja aðgang að því svæði og þeir  komast það ekki eins og stendur," segir Ísólfur Gylfi. 

read more

Það er sem hitabylgja gangi yfir Austurland í dag en búist er við að hitinn fari yfir 20 stig. Íbúar á Egilsstöðum voru búnir að bíða lengi eftir góða veðrinu og mættu í sundlaugina um leið og hún opnaði í morgun.

Sól og sumarylur leikur við Ausfirðinga í dag en spáð er allt að 23 stiga hita á Egilsstöðum. Rúnar Snær Reynisson fréttamaður var á ferðinni þar snemma í morgun leit meðal annars við í sundlauginni. Þar bjuggust starfsmenn við fullri laug í allan dag. Þess má geta að samfélagsdagurinn svokallaði er haldinn á Fljótsdalshéraði, Seyðisfirði og í Fjarðabyggð. Rótarýklúbbur Héraðsbúa ætlar sem dæmi um starf á samfélagsdaginn að lagfæra göngustíg að Gálgakletti og setja upp skilti. 

Greta Salóme Stefánsdóttir, höfundur og flytjandi framlags Íslands í Söngvakeppni evrópskra sjónvarpsstöðva, segir góða stemningu í íslenska hópnum fyrir stóru stundina í kvöld. Hún vonar að íslenska þjóðin skemmti sér vel í kvöld og verði stolt af frammistöðu hópsins.

Íslenska lagið, Never Forget, í flutningi Gretu Salóme og Jóns Jóseps Snæbjörnssonar verður sjöunda lagið á svið á úrslitakvöldi Söngvakeppni evrópskra sjónvarpsstöðva sem fram fer í kvöld. Tuttugu og sex lög keppa til úrslita, en keppnin verður sýnd í beint á RÚV og hefst útsendingin á slaginu sjö.

read more

Nú eru aðeins þrettán dagar í lokakeppni Evrópumótsins í knattspyrnu sem fram fer í Póllandi og Úkraínu en þetta er í fjórtánda sinn sem keppnin er haldin.

Alls hafa níu þjóðir fagnað Evrópumeistaratitlinum, Þjóðverjar oftast eða þrisvar sinnum. Spánverjar geta orðið fyrsta þjóðin til þess að verja titilinn vinni þeir í ár en það hefur engri þjóð tekist frá upphafi keppninnar. Fyrrum Evrópumeistarar:

read more

Ólafur Ragnar Grímsson virðist helst sækja fylgi sitt til kjósenda Sjálfstæðis- og Framsóknarflokks meðan kjósendur Samfylkingar og Vinstri Grænna styðja helst Þóru Arnórsdóttur. Flokkspólitískar skoðanir hafa minni áhrif á afstöðu til annarra frambjóðenda.

Capacent Gallup sendi í gær frá sér nýja skoðanakönnun um fylgi forsetaframbjóðenda.Ólafur Ragnar Grímsson hefur samkvæmt henni náð forskoti á Þóru Arnórsdóttur - fylgi við Ólaf mælist nú rúm 45% meðan tæp 37% kjósenda segjast myndu kjósa Þóru.Ari Trausti Guðmundsson mælist síðan með ríflega 9% - aðrir minna. Tvær aðrar kannanir voru birtar í gær sem sýna örlítið aðrar tölur. Grétar Eyþórsson, prófessor í stjórnmálafræði við Háskólann á Akureyri hefur farið yfir þær, sem og fleiri kannanir um fylgi forsetaframbjóðenda.

read more