Vikudagur

Dan Brynjarsson fjármálastjóri Akureyrarbæjar og Eggert Þór Óskarsson forstöðumaður fjárreiðudeildar mættu á síðasta fund skólanefndar og gerðu grein fyrir fyrirkomulagi innheimtumála og fóru yfir stöðuna á innheimtum sem heyra undir skóladeild. Fram kom að málum hjá Intrum vegna skulda í skólum hefur fjölgað um 50 á milli ára og heildarskuldir úr rúmum 14 milljónum króna í rúmar 19 milljónir króna.

Á morgun fimmtudag, verður Nigel David Bankes prófessor við lagadeild Háskólans í Calgary, sæmdur heiðursdoktors nafnbót við hug og félagsvísindasvið Háskólans á Akureyri vegna ómetanlegs framlags síns á sviði heimskautaréttar og tengdra greina. Nigel Bankes hefur á liðnum árum getið sér orð sem einn helsti sérfræðingur á sviði alþjóðlegs umhverfis- og auðlindaréttar en hann er einnig þekktur fyrir framlag sitt á sviði mannréttinda frumbyggja.

Bæjarstjórn Akureyrar samþykkti á fundi sínum í gær, með 7 atkvæðum gegn 4, ákvörðun framkvæmdaráðs frá 6. ágúst sl. um að breyta fyrri ákvörðun við sorphirðu úr leið A í leið B, sem er í samræmi við umsögn og bókun meirihluta umhverfisráðs 19. ágúst. Leið B gerir ráð fyrir tveimur sorptunnum við heimili og að íbúar fari með endurvinnslusorp út á hverfisvelli.

Ræktunarsamband Flóa og Skeiða ehf. á Selfossi bauð lægst í rannsóknarboranir vegna Vaðlaheiðarganga en tilboðin voru opnuð hjá Vegagerðinni í gær. Alls bárust fjögur tilboð í verkið og hljóðaði lægsta tilboðið upp á tæpar 36,9 milljónir króna, eða 78% af kostnaðaráætlun. Um er að ræða 600 m kjarnaborun og skal verkinu að fullu lokið þann 15. nóvember nk.